അപഹാസ്യങ്ങളിൽ തളരാതെ അഗാധതയിലേക്ക്; 2000 കിണറുകൾ സാക്ഷി, കുഞ്ഞുപെണ്ണ് 'സ്മാർട്ടാണ്

 

പ്രായം വെറുമൊരു അക്കം മാത്രമാണെന്ന് തെളിയിക്കുകയാണ് 75-കാരിയായ കുഞ്ഞുപെണ്ണ്. പുരുഷാധിപത്യം കൊടികുത്തി വാഴുന്ന കിണർ നിർമ്മാണ മേഖലയിൽ, കൈക്കോട്ടും പിക്കാസുമായി ഇറങ്ങി രണ്ടായിരത്തിലേറെ കിണറുകൾ നിർമ്മിച്ച് വിസ്മയമാവുകയാണ് ഈ പെൺകരുത്ത്. താൻ വെട്ടിയ ഒരു കിണറിൽ പോലും വെള്ളം കാണാതെ പോയിട്ടില്ലെന്ന ഉറച്ച വിശ്വാസമാണ് കുഞ്ഞുപെണ്ണിനെ ഈ മേഖലയിലെ 'വിശ്വസ്ത'യാക്കുന്നത്.

​വാശിയോടെ തുടങ്ങിയ തുടക്കം

​മുപ്പതാം വയസ്സിലാണ് കുഞ്ഞുപെണ്ണ് ആദ്യമായി കിണർ നിർമ്മാണത്തിലേക്ക് തിരിയുന്നത്. അന്ന് കൂലിപ്പണിക്ക് പോയിരുന്ന സമയത്ത് കിണർ കുഴിക്കുന്നത് നോക്കിനിന്ന കുഞ്ഞുപെണ്ണിനെ അവിടെയുണ്ടായിരുന്ന പുരുഷന്മാർ ആട്ടിയോടിച്ചു. "പെണ്ണുങ്ങൾ കാണാൻ പാടില്ലാത്ത ജോലിയാണിത്" എന്ന പരിഹാസം കുഞ്ഞുപെണ്ണിന്റെ ഉള്ളിൽ ഒരു വാശിയായി വളർന്നു. ആ വാശിയാണ് പിൽക്കാലത്ത് കേരളത്തിലെ അറിയപ്പെടുന്ന കിണർ പണിക്കാരിയായി അവരെ മാറ്റിയത്.

​പീടികത്താഴെ പള്ളിയിലെ അച്ചനാണ് കുഞ്ഞുപെണ്ണിലെ കഴിവിനെ ആദ്യം തിരിച്ചറിഞ്ഞത്. അച്ചന്റെ വീട്ടിലെ കിണർ കുഴിക്കാൻ കുഞ്ഞുപെണ്ണിന് അവസരം നൽകി. അവിടെ തുടങ്ങിയ ആത്മവിശ്വാസം ഇന്ന് 2000 കിണറുകൾ പിന്നിട്ടിരിക്കുന്നു.

​ജീവിതത്തിലെ പ്രതിസന്ധികൾ

​ദാരിദ്ര്യം മൂലം സ്കൂൾ വിദ്യാഭ്യാസം പാതിവഴിയിൽ ഉപേക്ഷിക്കേണ്ടി വന്ന കുഞ്ഞുപെണ്ണിന് ജീവിതം എന്നും പോരാട്ടമായിരുന്നു. വിവാഹജീവിതത്തിലും അപ്രതീക്ഷിത തിരിച്ചടികളുണ്ടായി. തമിഴ്നാട് സ്വദേശിയായ ഭർത്താവിന് നാട്ടിൽ മറ്റൊരു കുടുംബമുണ്ടെന്ന തിരിച്ചറിവിൽ ആ ബന്ധം ഉപേക്ഷിക്കുമ്പോൾ മകൻ കിഷോർ കൈക്കുഞ്ഞായിരുന്നു. പിന്നീട് മകന് വേണ്ടിയായി ജീവിതം. പണമില്ലാത്തതിനാൽ പത്താം ക്ലാസിന് ശേഷം മകനെ പഠിപ്പിക്കാൻ കഴിഞ്ഞില്ലെങ്കിലും, ഇന്ന് മകൻ കിഷോറാണ് കുഞ്ഞുപെണ്ണിന്റെ ഏറ്റവും വലിയ കരുത്തും സഹായിയും.

​വെല്ലുവിളികളെ അതിജീവിച്ച്

​ആഴങ്ങളിലേക്ക് ഇറങ്ങുമ്പോൾ ശ്വാസം മുട്ടുന്ന സാഹചര്യങ്ങളിൽ ഫാനുമായി താഴെ പോയി പണിയെടുക്കുന്ന കുഞ്ഞുപെണ്ണ് ഇന്നും തളരാതെ മുന്നോട്ട് പോകുന്നു. "ആണുങ്ങൾ ചെയ്യുന്ന പണിക്ക് പോകാൻ നാണമില്ലേ" എന്ന് ചോദിച്ചവർക്ക് മുന്നിൽ അഭിമാനത്തോടെ കുഞ്ഞുപെണ്ണ് തലയുയർത്തി നിൽക്കുന്നു.

​"ധൈര്യമുണ്ടെങ്കിൽ നമുക്ക് എന്തും ചെയ്യാം. പേടിക്ക് അവിടെ സ്ഥാനമില്ല. 75-ാം വയസ്സിലും അതേ ആവേശത്തോടെയാണ് ഞാൻ ജോലിക്ക് പോകുന്നത്." - കുഞ്ഞുപെണ്ണ് പറയുന്നു.

​സ്വന്തമായി ഒരു നല്ല വീട് എന്ന സ്വപ്നമാണ് കുഞ്ഞുപെണ്ണിന് ഇപ്പോഴുള്ളത്. മകനും കുടുംബത്തിനുമൊപ്പം സുരക്ഷിതമായി ഉറങ്ങാൻ കഴിയുന്ന ഒരു വീടിനായി ഈ എഴുപത്തഞ്ചാം വയസ്സിലും മണ്ണിലിറങ്ങി പണിയെടുക്കുകയാണ് ഈ ധീരവനിത