ഡോക്ടറാകാൻ മോഹിച്ച മകൾക്ക് അച്ഛൻ നൽകിയ മരുന്നിന് മരണത്തിന്റെ കയ്പ്പായിരുന്നു

 

ഗുജറാത്ത്: പ്രണയിച്ചതിന്റെ പേരിൽ സ്വന്തം മകളെ പിതാവ് ശ്വാസം മുട്ടിച്ച് ജീവനെടുത്തു. ഗുജറാത്തിലെ ദാന്തിയ ഗ്രാമത്തിൽ നടന്ന സംഭവത്തിൽ സന്ധ്യാഭായ് പട്ടേൽ എന്നയാളെ പോലീസ് അറസ്റ്റ് ചെയ്തു. ഡോക്ടറാകാൻ മോഹിച്ച ചന്ദ്രിക എന്ന പെൺകുട്ടിയാണ് 'കുടുംബ മഹിമ' കാക്കാനിറങ്ങിയ പിതാവിന്റെ ക്രൂരതയ്ക്ക് ഇരയായത്..

ഡോക്ടറായി വെള്ളക്കോട്ടണിഞ്ഞ് രോഗികളെ ചികിത്സിക്കണമെന്ന വലിയ സ്വപ്നവുമായി നടന്നവളായിരുന്നു ചന്ദ്രിക. നീറ്റ് പരീക്ഷയിൽ ഉന്നത വിജയം നേടി തന്റെ ലക്ഷ്യത്തിലേക്ക് അവൾ ഒരു ചുവടു കൂടി അടുത്തപ്പോഴാണ്, കാലം അവൾക്കായി മറ്റൊരു വിധി കാത്തുവെച്ചത്. ഇതിനിടെ ഹരീഷ് എന്ന യുവാവുമായി ചന്ദ്രിക പ്രണയത്തിലായി. എന്നാൽ ഈ ബന്ധത്തെ ചന്ദ്രികയുടെ കുടുംബം ശക്തമായി എതിർത്തു. വീട്ടുകാരുടെ ഉപദ്രവം സഹിക്കവയ്യാതെ ചന്ദ്രിക ഹരീഷിനൊപ്പം ഒളിച്ചോടിയിരുന്നു..

സ്വാധീനമുപയോഗിച്ച് പോലീസ് സഹായത്തോടെ ഹരീഷിനെ ജയിലിലാക്കിയ കുടുംബം, ചന്ദ്രികയെ ബലമായി വീട്ടിലെത്തിച്ചു. ഹരീഷിന്റെ ജീവന് ഭീഷണിയുയർന്നതോടെ പെൺകുട്ടിക്ക് തന്റെ പ്രണയത്തെ തള്ളിപ്പറയേണ്ടി വന്നു. എന്നാൽ പിറ്റേദിവസം കോടതിയിൽ ഹാജരാക്കിയാൽ സത്യം പുറത്തുവരുമെന്ന് ഭയന്ന സന്ധ്യാഭായ് പട്ടേൽ അന്നുരാത്രി ചന്ദ്രികയ്ക്ക് ഉറക്കഗുളിക കലർത്തിയ പാൽ നൽകി. ബോധരഹിതയായ മകളെ അയാൾ ശ്വാസം മുട്ടിക്കുക ആയിരുന്നു.

പക്ഷേ, ക്രൂരത അവിടെയും അവസാനിച്ചില്ല. കോടതിയിൽ ഹാജരാക്കുന്നതിന് തലേദിവസം, സത്യം പുറത്തുവരുമെന്ന ഭയത്താൽ ആ പിതാവ് കാലനായി മാറി. ഉറക്കഗുളിക കലർത്തിയ പാൽ നൽകി മയക്കിക്കിടത്തി, തന്റെ കരുത്തുറ്റ കൈകൾ കൊണ്ട് ആ അച്ഛൻ സ്വന്തം മകളുടെ ശ്വാസം മുട്ടിച്ചു. മകൾ മരിച്ചുവെന്ന് ഉറപ്പായപ്പോൾ അത് ഹൃദയാഘാതമാണെന്ന് വരുത്തിതീർക്കാൻ അയാൾ ശ്രമിച്ചു. ആർക്കും സംശയം തോന്നാതിരിക്കാൻ തിരക്കിട്ട് ശവസംസ്കാരവും നടത്തി.

പ്രണയിച്ചു എന്നത് മാത്രമായിരുന്നു അവൾ ചെയ്ത തെറ്റ്. 2025-ൽ ഗുജറാത്തിലെ ദാന്തിയ ഗ്രാമത്തിൽ നടന്ന ഈ ക്രൂരകൃത്യം കേവലം ഒരു കൊലപാതകമല്ല, മറിച്ച് നമ്മുടെ സമൂഹത്തിലെ ചീഞ്ഞുനാറിയ 'കുടുംബ മഹിമ'യുടെ ഇരയാക്കപ്പെട്ട ഒരു പെൺകുട്ടിയുടെ നിലവിളിയാണ്.

ശരീരം ചാരമായെങ്കിലും ചന്ദ്രികയുടെ നീതിക്ക് വേണ്ടിയുള്ള പോരാട്ടം അവസാനിച്ചില്ല. ജയിൽ മോചിതനായ ഹരീഷിന്റെ സംശയവും നിരന്തരമായ ഇടപെടലുമാണ് മറച്ചുപിടിച്ച സത്യങ്ങൾ പുറത്തുകൊണ്ടുവന്നത്. ഒടുവിൽ, ചോദ്യം ചെയ്യലിന് മുന്നിൽ പ്രതികൾക്ക് സത്യം വിളിച്ചുപറയേണ്ടി വന്നു.