താമരശ്ശേരിയിൽ നടുറോഡിൽ യുവാക്കളുടെ 'ഫുൾ ബോട്ടിൽ' കളി; ചോദ്യം ചെയ്ത ലോറി ഡ്രൈവർക്ക് നേരെ ആക്രോശം

 

റോഡാണോ അതോ ബാറോ? താമരശ്ശേരിയിൽ നടുറോഡിൽ യുവാക്കളുടെ 'ഫുൾ ബോട്ടിൽ' ആഘോഷം; ചോദ്യം ചെയ്ത ലോറി ഡ്രൈവർക്ക് നേരെ ഭീഷണി!

കോഴിക്കോട് താമരശ്ശേരിയിൽ നിന്നുള്ള ഞെട്ടിക്കുന്ന ഒരു ദൃശ്യമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. തിരക്കുള്ള പൊതുവഴിയിൽ യാതൊരു കൂസലുമില്ലാതെ നടുറോഡിലിരുന്ന് മദ്യപിക്കുന്ന രണ്ട് യുവാക്കൾ! കോരങ്ങാട് കൊളിക്കൽ റോഡിൽ അൽഫോൺസ സ്കൂളിന് മുൻവശമാണ് ഈ വിചിത്ര സംഭവം അരങ്ങേറിയത്.

റോഡിന് നടുവിൽ കുപ്പിയും ഗ്ലാസുമായി ഇരിപ്പുറപ്പിച്ച യുവാക്കൾ കാരണം വാഹനങ്ങൾക്ക് കടന്നുപോകാൻ കഴിയാത്ത അവസ്ഥയായിരുന്നു. തുടർന്ന് അവിടെയെത്തിയ ഒരു ലോറി ഡ്രൈവർ വഴിമാറാനായി ഹോൺ അടിച്ചതോടെയാണ് നാടകീയ രംഗങ്ങൾ തുടങ്ങിയത്. വഴിമാറുന്നതിന് പകരം ലോറി ഡ്രൈവർക്ക് നേരെ ആക്രോശിക്കാനും ഭീഷണിപ്പെടുത്താനുമാണ് മദ്യലഹരിയിലായിരുന്ന യുവാക്കൾ തുനിഞ്ഞത്.

"ചെലക്കാണ്ട് പോടാ..." എന്നാക്രോശിച്ചുകൊണ്ട് ഡ്രൈവറുടെ അടുത്തേക്ക് പാഞ്ഞടുക്കുന്ന യുവാക്കളുടെ ദൃശ്യങ്ങൾ ഡ്രൈവർ തന്നെയാണ് മൊബൈലിൽ പകർത്തിയത്. ഇന്ന് ഉച്ചയ്ക്ക് 2:35-ഓടെയായിരുന്നു സംഭവം. പൊതുജനങ്ങൾക്ക് ശല്യമുണ്ടാക്കുന്ന രീതിയിൽ പരസ്യ മദ്യപാനവും ഗുണ്ടായിസവും കാണിച്ച ഇവർക്കെതിരെ ശക്തമായ പ്രതിഷേധമാണ് ഉയരുന്നത്. നിയമം കയ്യിലെടുക്കുന്ന ഇത്തരം 'റോഡ് ഷോ'കൾക്കെതിരെ അധികൃതർ കടുത്ത നടപടി സ്വീകരിക്കണമെന്നാണ് നാട്ടുകാരുടെ ആവശ്യം.