നന്മ മരങ്ങൾ ഉണങ്ങുന്ന കാലം; ജീവൻ രക്ഷിക്കാൻ ഓടിയെത്തിയ യുവാവിന് കിട്ടിയത് ക്രൂരമർദനം!

 

റോഡരികിൽ ചോര വാർന്ന് ഒരാൾ കിടക്കുന്നത് കണ്ടാൽ വണ്ടി നിർത്താതെ പോകുന്നവരെ നമ്മൾ ഒരുപാട് കുറ്റപ്പെടുത്താറുണ്ട്. എന്നാൽ, ആപത്തിൽപ്പെട്ടവനെ സഹായിക്കാൻ ചെന്നാൽ ഇതാണ് അവസ്ഥയെങ്കിൽ സാധാരണക്കാർ എന്തുചെയ്യണം? കുണ്ടന്നൂരിൽ നടന്ന ഈ സംഭവം നന്മ ചെയ്യാൻ ആഗ്രഹിക്കുന്ന ഏതൊരാളെയും തളർത്തുന്നതാണ്.

തന്റെ കൺമുന്നിൽ അപകടത്തിൽപ്പെട്ട് ചലനമറ്റ നിലയിൽ കിടന്ന ഒരാളെ രക്ഷിക്കാനാണ് ആ യുവാവും ഭാര്യയും വണ്ടി നിർത്തിയത്. കടയിൽ നിന്ന് വെള്ളമെടുത്തു മുഖത്ത് തളിച്ചു, നാഡിമിടിപ്പ് പരിശോധിച്ചു ജീവനുണ്ടെന്ന് ഉറപ്പിച്ചു. കൃത്യസമയത്ത് സി.പി.ആർ (CPR) നൽകി അയാളെ ജീവിതത്തിലേക്ക് തിരികെ കൊണ്ടുവരാൻ ശ്രമിക്കുന്നതിനിടെയാണ് എല്ലാം മാറിമറിഞ്ഞത്.

അപകടത്തിൽപ്പെട്ടവരിൽ നിന്നും മദ്യത്തിന്റെ രൂക്ഷഗന്ധം വന്നപ്പോൾ, "ആരാണ് വണ്ടി ഓടിച്ചത്?" എന്നൊരു ചോദ്യം ചോദിക്കേണ്ടി വന്നു. ആ ഒറ്റ ചോദ്യത്തിന് മറുപടിയായി കിട്ടിയത് ക്രൂരമായ മർദനമാണ്. "ഞങ്ങടെ കൂട്ടുകാരനെ രക്ഷിക്കാൻ ഞങ്ങൾക്ക് അറിയാം, നീയാരാടാ ചോദിക്കാൻ" എന്ന് ആക്രോശിച്ചുകൊണ്ട് ഹെൽമെറ്റ് ഉപയോഗിച്ച് തലയ്ക്കടക്കം സംഘം ചേർന്ന് മർദിക്കുകയായിരുന്നു.

കൊച്ചിയിൽ നിന്ന് കേൾക്കുന്നത് അങ്ങേയറ്റം വിചിത്രവും ലജ്ജിപ്പിക്കുന്നതുമായ ഒരു വാർത്തയാണ്. അപകടത്തിൽപ്പെട്ട് റോഡരികിൽ മരണാസന്നനായി കിടന്ന ഒരാളെ ജീവിതത്തിലേക്ക് കൈപിടിച്ചുയർത്താൻ ശ്രമിച്ച യുവാവിനാണ് ഈ ദുരനുഭവം ഉണ്ടായത്.

മദ്യലഹരിയിൽ ബൈക്കിൽ സഞ്ചരിച്ച മൂന്നംഗ സംഘം കൊച്ചി നെട്ടൂർ മേൽപ്പാലത്തിന് സമീപം വച്ച് അപകടത്തിൽപ്പെടുകയായിരുന്നു. ബൈക്കിലുണ്ടായിരുന്ന ഷൈജു എന്നയാൾ റോഡരികിൽ ശ്വാസം കിട്ടാതെ അവശനിലയിലായി. ഈ സമയം അതുവഴി ഭാര്യയോടൊപ്പം ബൈക്കിൽ വരികയായിരുന്ന യുവാവ്, കാഴ്ചക്കാരനായി നിൽക്കാതെ ഉടൻ തന്നെ ഷൈജുവിന് പ്രാഥമിക ശുശ്രൂഷയായ സി.പി.ആർ (CPR) നൽകി. ഇതോടെ ഷൈജു ബോധത്തിലേക്ക് തിരിച്ചുവരികയും ചെയ്തു.

എന്നാൽ ഇതിനുശേഷം നടന്നത് ആരെയും അമ്പരപ്പിക്കുന്ന കാര്യമാണ്. സഹായിക്കാൻ എത്തിയ യുവാവ് തന്റെ സുഹൃത്തിനെ ഉപദ്രവിക്കുകയാണെന്ന് തെറ്റിദ്ധരിച്ച അർജുനും ഉമേഷും ചേർന്ന് യുവാവിനെ ക്രൂരമായി മർദ്ദിക്കാൻ തുടങ്ങി. അൽപ്പസമയം മുൻപ് സി.പി.ആർ നൽകി ജീവിതത്തിലേക്ക് മടക്കിക്കൊണ്ടുവന്ന ഷൈജുവും ബോധം വീണതോടെ ഇവർക്കൊപ്പം ചേർന്ന് യുവാവിനെ മർദ്ദിച്ചു എന്നതാണ് ഇതിലെ ഏറ്റവും ഖേദകരമായ വസ്തുത.