വിധി തട്ടിയെടുത്തത് ഒരു അച്ഛന്റെയും മകളുടെയും സ്വപ്നങ്ങൾ; വെള്ളിമാടുകുന്നിലെ ആ വളവ് വീണ്ടും മരണക്കെണിയായി

  

കോഴിക്കോട് നഗരത്തെ ഒന്നടങ്കം കണ്ണീരിലാഴ്ത്തിയിരിക്കുകയാണ് വെള്ളിമാടുകുന്നിലുണ്ടായ ആ ദാരുണമായ അപകടം. ജെ.ഡി.ടി ആർട്സ് ആൻഡ് സയൻസ് കോളേജിലെ തന്റെ പ്രിയപ്പെട്ട മകൾ ഫാത്തിമ നേഹയെയും കൂട്ടി പതിവുപോലെ യാത്ര തിരിച്ചതായിരുന്നു ആ പിതാവ്. എന്നാൽ, എൻ.ജി.ഒ ക്വാർട്ടേഴ്സ് റോഡിലെ ആ കൊടുംവളവ് അവർക്കായി കരുതിവെച്ചത് മറ്റൊന്നായിരുന്നു.

നിയന്ത്രണം വിട്ട സ്കൂട്ടർ താഴ്ചയിലുള്ള വീടിന് മുകളിലേക്ക് മറിഞ്ഞു വീണപ്പോൾ, പൊലിഞ്ഞുപോയത് രണ്ട് ജീവനുകൾ മാത്രമല്ല, ഒരു കുടുംബത്തിന്റെ മുഴുവൻ പ്രതീക്ഷകളുമാണ്. നാട്ടുകാർ ഓടിക്കൂടി ഉടൻ തന്നെ ഇരുവരെയും മെഡിക്കൽ കോളേജിൽ എത്തിച്ചെങ്കിലും ആ ജീവനുകൾ രക്ഷിക്കാനായില്ല.

അപകടം നടന്നസ്ഥലം അതീവ അപകട സാധ്യതയുള്ള കൊടും വളവാണ്. ഇവിടെ നിയന്ത്രണം വിട്ട സ്‌കൂട്ടർ താഴ്ചയിലുള്ള വീടിന്റെ മുകളിലേക്കാണ് പതിച്ചത്. ഈ റോഡിൽ അപകടം പതിവാണെന്ന് നാട്ടുകാർ പറയുന്നു. അപകട സാധ്യതയുള്ള വളവിൽ ഒരു സുരക്ഷാ സംവിധാനവും ഒരുക്കിയിട്ടില്ല. കഴിഞ്ഞ ദിവസമാണ് ഇവിടെ ഒരു ബോർഡ് സ്ഥാപിച്ചതെന്നും നാട്ടുകാർ പറഞ്ഞു. അപകട മേഖലയാണെന്ന് കാണിച്ച് റോഡിൽ ബോർഡുകൾ സ്ഥാപിച്ചിട്ടുണ്ടെങ്കിലും മതിയായ സുരക്ഷാ ക്രമീകരണങ്ങളില്ലാത്തത് യാത്രക്കാർക്ക് ഭീഷണിയാകുന്നു...