പേരാമ്പ്രയിൽ നിയന്ത്രണം വിട്ട കാർ ടെലിഫോൺ പോസ്റ്റിലിടിച്ച് മറിഞ്ഞു; യാത്രക്കാർ അത്ഭുതകരമായി രക്ഷപ്പെട്ടു

പേരാമ്പ്ര: ആവളയിൽ നിന്നും പേരാമ്പ്ര ഭാഗത്തേക്ക് വരികയായിരുന്ന കാർ നിയന്ത്രണം വിട്ട് മറിഞ്ഞു. പന്നിമുക്ക് കുറ്റ്യേട്ട് നടക്ക് സമീപം ഇന്ന് വൈകുന്നേരം നാല് മണിയോടെയായിരുന്നു അപകടം. റോഡരികിലെ ടെലിഫോൺ പോസ്റ്റിലിടിച്ച കാർ പൂർണ്ണമായും തലകീഴായി മറിയുകയായിരുന്നു.

അപകടസമയത്ത് കാറിലുണ്ടായിരുന്നവർ പരിക്കുകളേൽക്കാതെ അത്ഭുതകരമായി രക്ഷപ്പെട്ടു. ആവള സ്വദേശികളാണ് വാഹനത്തിലുണ്ടായിരുന്നത്. നിയന്ത്രണം വിട്ട കാർ പോസ്റ്റിലിടിച്ച് മറിയുന്നത് കണ്ട് ഓടിക്കൂടിയ നാട്ടുകാരാണ് രക്ഷാപ്രവർത്തനം നടത്തിയത്. ഇടിയുടെ ആഘാതത്തിൽ ടെലിഫോൺ പോസ്റ്റ് തകർന്നിട്ടുണ്ട്. കാറിനും കാര്യമായ കേടുപാടുകൾ സംഭവിച്ചു.