വിധി തോറ്റുപോയ സ്‌നേഹം; 35 വർഷമായി ബിന്ദുവിനെ നെഞ്ചോട് ചേർത്ത് പ്രസീധരൻ!

 

പത്താം ക്ലാസിൽ പഠിക്കുമ്പോൾ നട്ടെല്ലിനെ ബാധിച്ച ട്യൂമർ ബിന്ദുവിന്റെ ജീവിതം ഇരുട്ടിലാക്കി. എഴുന്നേറ്റ് നിൽക്കാൻ പോലും കഴിയാത്ത ആ അവസ്ഥയിൽ, എല്ലാമറിഞ്ഞിട്ടും ബിന്ദുവിനെ നെഞ്ചോട് ചേർത്ത ഒരാളുണ്ടായിരുന്നു; പ്രസീധരൻ. 1993-ൽ ഒരു രജിസ്റ്റർ വിവാഹത്തിലൂടെ തുടങ്ങിയ ആ യാത്ര ഇന്ന് മൂന്ന് പതിറ്റാണ്ടുകൾ പിന്നിടുമ്പോഴും മാറ്റമില്ലാതെ തുടരുന്നു.

കഴിഞ്ഞ 15 വർഷമായി ബിന്ദു പൂർണ്ണമായും കിടപ്പിലാണ്. പ്രസീധരന്റെ ഒരു ദിവസം ആരംഭിക്കുന്നത് പുലർച്ചെ 4.30-നാണ്. ഭക്ഷണം പാകം ചെയ്യുന്നത് മുതൽ ബിന്ദുവിനെ കുളിപ്പിക്കുന്നതും പ്രാഥമിക കൃത്യങ്ങൾ ചെയ്യിക്കുന്നതും വരെ പ്രസീധരൻ ഒറ്റയ്ക്കാണ് ചെയ്യുന്നത്. "അവളെ വിട്ട് മറ്റൊരു ലോകം എനിക്കില്ല" എന്ന അദ്ദേഹത്തിന്റെ വാക്കുകളിൽ ആ സ്നേഹത്തിന്റെ ആഴം നമുക്ക് കാണാം.

തേപ്പുപണിക്ക് പോയി കിട്ടുന്ന തുച്ഛമായ വരുമാനം കൊണ്ടാണ് ഈ കുടുംബം കഴിയുന്നത്. മകൾ അഹല്യയുടെ വിവാഹം കഴിഞ്ഞു, മകൻ കിരൺ ജോലിക്കു പോകുന്നുണ്ട്. എങ്കിലും, പണി തീരാത്ത വീടിന്റെ സാഹചര്യവും തുടർച്ചയായ ചികിത്സാച്ചെലവുകളും ഈ കുടുംബത്തെ വല്ലാതെ തളർത്തുന്നുണ്ട്.

വർഷങ്ങളോളം ബിന്ദുവിനെ കൈകളിൽ കോരിയെടുത്ത് പരിചരിച്ചതുകൊണ്ട് പ്രസീധരൻ ഇപ്പോൾ കഠിനമായ നടുവേദനയുടെ പിടിയിലാണ്. വിശ്രമം വേണമെന്ന് ഡോക്ടർമാർ നിർദ്ദേശിച്ചിരിക്കുകയാണ്. ജോലിക്ക് പോകാൻ കഴിയാത്ത ഈ സാഹചര്യത്തിൽ, സ്നേഹത്തിന്റെ ഈ കരുത്തുറ്റ മാതൃക നിലനിൽക്കാൻ നമ്മുടെയൊക്കെ പിന്തുണ അത്യാവശ്യമാണ്.