സ്വന്തം ജീവൻ നോക്കാതെ കുളത്തിലേക്ക് എടുത്തുചാട്ടം 3 പിഞ്ചുജീവനുകൾക്ക് കാവലായി അവന്‍...

 

മലപ്പുറം: മരണത്തിന്റെ ആഴങ്ങളിലേക്ക് താഴ്ന്നുപോയ 3 പിഞ്ചുജീവനുകളെ സ്വന്തം ജീവൻ പണയപ്പെടുത്തി ജീവിതത്തിലേക്ക് തിരിച്ചുപിടിച്ച ഷാമിലിന് രാഷ്ട്രപതിയുടെ ഉത്തം ജീവൻ രക്ഷാ പഥക്. മങ്കട വെള്ളിലയിൽ നടന്ന അപകടത്തിൽ അസാമാന്യ ധീരത പ്രകടിപ്പിച്ച ഷാമിലിനെ രാജ്യം ആദരിക്കുകയാണ്..

മങ്കട വെള്ളിലയിലെ ഒരു വിവാഹവീട്ടിൽ കളിച്ചുകൊണ്ടിരുന്ന 3 പെൺകുട്ടികൾ അബദ്ധത്തിൽ ആഴമേറിയ കുളത്തിലേക്ക് വീഴുകയായിരുന്നു. കലങ്ങിയ വെള്ളത്തിൽ കുരുന്നുകൾ ഒന്നൊന്നായി മുങ്ങിത്താഴുന്നത് കണ്ടുനിന്നവർ ഭയന്നുവിറച്ചു നിൽക്കെയാണ് 200 മീറ്റർ അകലെ നിന്ന് ഷാമിൽ ഓടിയെത്തിയത്. മറ്റൊന്നും ചിന്തിക്കാതെ ഷാമിൽ കുളത്തിലേക്ക് എടുത്ത് ചാടുകയായിരുന്നു..

ആദ്യ 2 കുട്ടികളെയും അതിവേഗം കരയ്ക്കടുപ്പിക്കാൻ ഷാമിലിന് സാധിച്ചു. എന്നാൽ മൂന്നാമത്തെ കുട്ടി അപ്പോഴേക്കും പൂർണ്ണമായും വെള്ളത്തിനടിയില്‍ ആയിരുന്നു. കലങ്ങിയ വെള്ളത്തിൽ ഒന്നും കാണാൻ സാധിക്കാത്ത സാഹചര്യത്തിലും പിന്മാറാൻ ഷാമിൽ തയ്യാറായില്ല. മൂന്നാം തവണയും ആഴങ്ങളിലേക്ക് മുങ്ങിത്തപ്പിയ ഷാമിൽ ഒടുവിൽ ആ കുഞ്ഞിനെയും സുരക്ഷിതമായി പുറത്തെടുത്തു. സഹോദരൻ ഷെഹിന്റെ ഉറച്ച പിന്തുണയും ഷാമിലിന് കരുത്തേകി.

അപകടത്തിൽപ്പെട്ടവർ ആരാണെന്ന് പോലും നോക്കാതെ മനുഷ്യത്വം മാത്രം മുൻനിർത്തി ഷാമിൽ നടത്തിയ ഈ പോരാട്ടം ഇന്ന് കേരളത്തിന് തന്നെ മാതൃകയാണ്. ഒരു മനുഷ്യൻ മറ്റൊരാൾക്ക് വേണ്ടി കാട്ടുന്ന ഏറ്റവും വലിയ സ്നേഹത്തിന്റെ അടയാളമാണ് ഷാമിലിനെ തേടിയെത്തിയ ഈ പുരസ്കാരമെന്ന് നാട്ടുകാർ ഒന്നടങ്കം പറയുന്നു. ഈ ധീരതയുടെ വാർത്ത ലോകമെമ്പാടുമുള്ള മലയാളികൾക്ക് വലിയ ആവേശമാണ് പകരുന്നത്..