2 വർഷത്തോളം രോഗത്തോട് ധൈര്യമായി പോരാടി ഒടുവില്‍ തന്റെ ജീവിതയാത്ര അവസാനിച്ച് യാത്രയായി

 

ജീവിതത്തിന്റെ പ്രതിസന്ധികളിൽ തളരാതെ, പുഞ്ചിരിയോടെ പോരാടി വിടവാങ്ങിയ ഒരു മാതൃകാ വ്യക്തിത്വത്തെയാണ് നമുക്ക് നഷ്ടമായിരിക്കുന്നത്. ആലുവ ഗവൺമെന്റ് ഹോസ്പിറ്റലിലെ ഇലക്ട്രീഷ്യൻ തച്ചവള്ളത്ത് ഹാഷിമിന്റെ ഭാര്യ ഷൈല, 2 വർഷത്തോളം നീണ്ടുനിന്ന രോഗത്തോടുള്ള ധീരമായ പോരാട്ടത്തിനൊടുവിൽ തന്റെ ജീവിതയാത്ര അവസാനിപ്പിച്ചു..

പെരുമ്പാവൂർ വാഴക്കുളം ചെറുവേലിക്കുന്ന് ചെറുപറമ്പിൽ മക്കാറിന്റെയും സുഹറയുടെയും മകളായി ജനിച്ച ഷൈല, ചെറുപ്പം മുതലേ തന്റെ സ്വഭാവമഹിമ കൊണ്ട് ശ്രദ്ധിക്കപ്പെട്ടവളായിരുന്നു. സൗമ്യമായ, പെരുമാറ്റവും മറ്റുള്ളവരെ സഹായിക്കാനുള്ള സന്നദ്ധതയുമായിരുന്നു അവരുടെ മുഖമുദ്ര. വിവാഹശേഷം ചൂർണിക്കര പഞ്ചായത്തിലെ സാമൂഹിക മണ്ഡലങ്ങളിൽ അവർ ഒരു വലിയ സ്വാധീനമായി മാറി.

പഞ്ചായത്ത് സാക്ഷരതാ പ്രേരകയായി സേവനമനുഷ്ഠിച്ച കാലത്ത്, അറിവിന്റെ ലോകത്തേക്ക് പലരെയും കൈപിടിച്ചുയർത്താൻ അവർക്ക് സാധിച്ചു. അക്ഷരങ്ങളുടെ വഴിയിലൂടെ അനേകം ജീവിതങ്ങളിൽ വെളിച്ചം തെളിച്ച ഒരു വലിയ വിളക്കായിരുന്നു അവർ. സാധാരണക്കാരായ സ്ത്രീകളുടെ ഉന്നമനത്തിനായി കുടുംബശ്രീ വഴി അവർ നടത്തിയ പ്രവർത്തനങ്ങൾ സമൂഹം എന്നും നന്ദിയോടെ ഓർക്കും..

കഴിഞ്ഞ 2 വർഷം ശാരീരികമായി ഏറെ പ്രയാസകരമായിരുന്നെങ്കിലും, മനസ്സ് കൊണ്ട് ഷൈല ഒരിക്കലും തോറ്റു കൊടുത്തില്ല. അർബുദമെന്ന കഠിനമായ അവസ്ഥയിലും വലിയ വിശ്വാസത്തോടും. ആത്മധൈര്യത്തോടും കൂടിയാണ് അവർ ഓരോ ദിവസത്തെയും നേരിട്ടത്. ആ പോരാട്ടവീര്യം കണ്ടുനിൽക്കുന്നവർക്കെല്ലാം ഒരു വലിയ പാഠമായിരുന്നു...