വിവാഹിതനും 2 കുട്ടികളുടെ അച്ഛനുമാണെന്ന സത്യം മറച്ചുവെച്ചു, ഇൻസ്റ്റഗ്രാം പ്രണയം ഒടുവില്‍ സെപ്റ്റിക് ടാങ്കില്‍ അവസാനിച്ചപ്പോൾ.

 

പ്രണയിക്കുന്നവർക്ക് സന്തോഷം പകരേണ്ട ഈ പ്രണയദിനത്തിൽ, കേൾക്കുന്നവരുടെ കരളലിയിക്കുന്ന വാർത്തയാണ് പുറത്തുവരുന്നത്. ഇൻസ്റ്റഗ്രാമിലൂടെ തുടങ്ങിയ ഒരു കൊച്ചു പരിചയം, വലിയൊരു സ്വപ്നമായി കണ്ട് വീടുവിട്ടിറങ്ങിയ ഒരു യുവതിക്ക് ഒടുവിൽ ലഭിച്ചത് മരണമായിരുന്നു..

മഹാരാഷ്ട്രയിലെ ഗോൻഡിയ സ്വദേശിയായ സിയ എന്ന യുവതി, സമീർ എന്ന യുവാവിനെ പ്രണയിച്ചത് അവൻ നൽകിയ വാഗ്ദാനങ്ങൾ വിശ്വസിച്ചായിരുന്നു. സമീറില്ലാതെ ജീവിക്കാനാകില്ലെന്ന ഉറച്ച തീരുമാനത്തിൽ 3 മാസം മുമ്പ് അവൾ തൻ്റെ വീടുപേക്ഷിച്ച് ഭോപ്പാലിലെത്തി. എന്നാൽ, അവിടെ അവളെ കാത്തിരുന്നത് വലിയൊരു ചതിയായിരുന്നു. താൻ പ്രാണനെപ്പോലെ സ്നേഹിച്ച സമീർ വിവാഹിതനും 2 കുട്ടികളുടെ പിതാവുമാണെന്ന സത്യം അവൾ തിരിച്ചറിഞ്ഞത് ഭോപ്പാലിലെത്തിയപ്പോൾ മാത്രമാണ്..

തിരിച്ചുപോകാൻ ഒരിടമില്ലാതെ, വഞ്ചിക്കപ്പെട്ട വേദനയുമായി അതേ വീട്ടിൽ കഴിയേണ്ടി വന്ന സിയയുടെ ജീവിതം നരകതുല്യമായി. തർക്കങ്ങൾക്കും അവഗണനകൾക്കും ഒടുവിൽ, തനിക്ക് അർഹമായ നഷ്ടപരിഹാരം വേണമെന്ന സിയയുടെ ആവശ്യം സമീറിനെ വല്ലാതെ പ്രകോപിപ്പിച്ചു. കഴിഞ്ഞ തിങ്കളാഴ്ചയുണ്ടായ വാക്കുതർക്കത്തിനിടെ, സിയയുടെ കഴുത്തുഞെരിച്ച് അവൻ ആ ജീവൻ കവർന്നെടുത്തു..

കൃത്യം നടത്തിയ ശേഷം സമീറിൻ്റെ കുടുംബാംഗങ്ങൾ പോലും അവനെ സഹായിക്കാൻ എത്തിയെന്നത് നടുക്കുന്ന സത്യമാണ്. സിയയുടെ ശരീരം ഒരു ഇരുമ്പ് പെട്ടിയിലാക്കി, വീടിന് സമീപത്തെ ആളൊഴിഞ്ഞ പറമ്പിലെ സെപ്റ്റിക് ടാങ്കിൽ അവർ ഉപേക്ഷിച്ചു. 3 ദിവസങ്ങൾക്ക് ശേഷം പ്രദേശത്തെ കുട്ടികൾ കളിക്കുന്നതിനിടെ ഉണ്ടായ ദുർഗന്ധമാണ് ആ ക്രൂരതയുടെ ചുരുളഴിച്ചത്..

'പ്രണയം തേടി വന്നവൾക്ക് ഒടുവിൽ ഒരു സെപ്റ്റിക് ടാങ്കിൽ അന്ത്യം കുറിക്കേണ്ടി വന്നു എന്നത് ഏതൊരു മനുഷ്യസ്നേഹിയേയും വേദനിപ്പിക്കുന്നതാണ്.'

ഒടുവിൽ കൈത്തണ്ടയിലെ ടാറ്റു കണ്ട് ബന്ധുക്കൾ തിരിച്ചറിഞ്ഞപ്പോൾ, തിരിച്ചറിയാൻ പോലും കഴിയാത്ത വിധം ആ ശരീരം ചീഞ്ഞളിഞ്ഞു പോയിരുന്നു. ഒരു നിമിഷത്തെ വികാരത്തിൽ വിശ്വസിച്ച് ഇറങ്ങിത്തിരിക്കുന്നവർക്ക് ഈ വാർത്ത ഒരു വലിയ നോവായി അവശേഷിക്കുന്നു..