അച്ഛന്റെ സംസ്കാരം കഴിഞ്ഞ് മടങ്ങി എത്തിയവർക്ക് മുന്നിലേക്ക് മകന്റെ മരണവാർത്ത

 

നെല്ലിമറ്റം: വിധിയുടെ മുന്നിൽ വിറങ്ങലിച്ച് നിൽക്കുകയാണ് പൈമറ്റം കര. സ്നേഹനിധിയായ പിതാവിന്റെ വേർപാടിൽ വിതുമ്പിയ ആ കുടുംബത്തിലേക്ക് മണിക്കൂറുകൾക്കകം മകന്റെ മരണ വാർത്തയും എത്തിയപ്പോൾ അത് ഒരു നാടിനാകെ താങ്ങാവുന്നതിലുമപ്പുറമായി. 'സോഡ പൗലോസ്' എന്ന് നാട്ടുകാർ സ്നേഹത്തോടെ വിളിച്ചിരുന്ന പൈമറ്റം ഇളവുംകുടിയിൽ പൗലോസിന്റെ (75) സംസ്കാരം കഴിഞ്ഞ് മടങ്ങിയെത്തിയ പ്രിയപ്പെട്ടവരെ കാത്തിരുന്നത് മകൻ ജയിംസിന്റെ (53) വിയോഗ വാർത്തയായിരുന്നു..

ബുധനാഴ്ച രാവിലെ 10 മണിയോടെ പൗലോസേട്ടന്റെ സംസ്കാര ചടങ്ങുകൾ പള്ളിയിൽ നടന്നു തീർന്നതേയുള്ളൂ. വേദനയോടെ ആ മണ്ണ് മൂടി തിരിച്ചെത്തിയ ബന്ധുക്കൾക്കും സുഹൃത്തുക്കൾക്കും മുന്നിലേക്കാണ്, തൊടുപുഴ അൽ അസർ മെഡിക്കൽ കോളേജിൽ ചികിത്സയിലായിരുന്ന മകന്‍ ജയിംസും യാത്രയായി എന്ന തീരാനഷ്ടത്തിന്റെ വാർത്തയും എത്തിയത്. അച്ഛന് അന്ത്യയാത്ര നൽകിയവർക്ക് തന്നെ മകനും വിട നൽകേണ്ടി വരുന്ന അവസ്ഥ ആരെയും കരയിക്കുന്നതാണ്.

തന്റെ പിതാവിനെപ്പോലെ തന്നെ കണ്ടുമുട്ടുന്നവരോടൊക്കെ നിറഞ്ഞ ചിരിയോടെ വിശേഷങ്ങൾ തിരക്കുന്ന പ്രകൃതമായിരുന്നു ജയിംസിന്റേതും. കഠിനാധ്വാനം കൊണ്ട് ജീവിതം കെട്ടിപ്പടുത്ത ആ അച്ഛനും, മകനും പച്ചയായ നാട്ടിൻപുറത്തുകാരുടെ നന്മയുടെ പ്രതീകങ്ങളായിരുന്നു. മികച്ചൊരു ഗായകൻ കൂടിയായിരുന്ന ജയിംസ് ബസ് ജീവനക്കാർക്കിടയിലും, നാട്ടുകാർക്കിടയിലും പ്രിയങ്കരനായിരുന്നു.

കുട്ടിക്കാലം മുതൽ പകർന്നു നൽകിയ വാത്സല്യവും, മുതിർന്നപ്പോഴും കാത്തുസൂക്ഷിച്ച ആ ആത്മബന്ധവും ഓർത്തെടുക്കുമ്പോൾ പ്രിയപ്പെട്ടവർക്ക് വാക്കുകളില്ല. പൗലോസേട്ടനും അച്ഛന്റെ തണലായിരുന്ന മകനും ഒരേ ദിവസം തന്നെ വിടവാങ്ങുമ്പോൾ കാലം ബാക്കിവെക്കുന്നത് ഒരിക്കലും നികത്താനാവാത്ത ശൂന്യതയാണ്. ജയിംസിന്റെ സംസ്കാരം നാളെ ഉച്ചയ്ക്ക് 12 മണിക്ക് പരീക്കണ്ണി സെന്റ് മേരീസ് പള്ളിയിൽ നടക്കും.