യൂണിഫോമിട്ട് വന്ന തട്ടിപ്പുകാരൻ കുടുങ്ങി; കണ്ണൂരിൽ സൈബർ തട്ടിപ്പിന് തടയിട്ട് വിരമിച്ച ബാങ്ക് മാനേജരും പോലീസും

കണ്ണൂരിൽ പോലീസ് വേഷധാരിയായി വീഡിയോ കോളിലെത്തി തട്ടിപ്പിന് ശ്രമിച്ച സംഘത്തെ സമർത്ഥമായി കുടുക്കി വിരമിച്ച ഒരു ബാങ്ക് മാനേജർ. കണ്ണൂർ തോട്ടട സ്വദേശിയായ പ്രമോദ് മഠത്തിലിനെയാണ് സൈബർ തട്ടിപ്പ് സംഘം ഇരയാക്കാൻ ശ്രമിച്ചത്. 'ഡാറ്റാ പ്രൊട്ടക്ഷൻ ബോർഡ് ഓഫ് ഇന്ത്യ'യിലെ ഉദ്യോഗസ്ഥൻ എന്ന വ്യാജേന പോലീസ് യൂണിഫോം ധരിച്ചാണ് തട്ടിപ്പുകാരൻ വീഡിയോ കോളിലെത്തിയത്.

പ്രമോദിന്റെ പേരിൽ കാനറ ബാങ്കിൽ അക്കൗണ്ട് തുടങ്ങി കോടികളുടെ ഭീകരവാദ ഫണ്ടിംഗും കള്ളപ്പണം വെളുപ്പിക്കലും നടന്നുവെന്നായിരുന്നു തട്ടിപ്പുകാരന്റെ വാദം. എന്നാൽ ബാങ്ക് മാനേജരായി വിരമിച്ച പ്രമോദിന് ആദ്യമേ സംശയം തോന്നി. തന്റെ ഐഡന്റിറ്റി കാർഡ് കാണിക്കാൻ ആവശ്യപ്പെട്ട പ്രമോദിനോട് അത് അയച്ചു തരാമെന്നും, വേഗം അപ്പോയിന്റ്‌മെന്റ് എടുത്ത് നടപടികളിലേക്ക് കടക്കണമെന്നും തട്ടിപ്പുകാരൻ പറഞ്ഞു.

തട്ടിപ്പുകാരൻ യൂണിഫോമിൽ ഗമയിലിരുന്ന് സംസാരിക്കുമ്പോഴേക്കും പ്രമോദ് പോലീസിനെ വിവരമറിയിച്ചിരുന്നു. സംഭാഷണം നീട്ടിക്കൊണ്ടുപോയി തട്ടിപ്പുകാരനെ പ്രമോദ് എൻഗേജ് ചെയ്യിച്ചു. ഒടുവിൽ ബാങ്ക് മാനേജരുടെ വീട്ടിലെത്തിയ പോലീസുകാർ വീഡിയോ കോളിന് മുന്നിൽ പ്രത്യക്ഷപ്പെട്ടതോടെ തട്ടിപ്പുകാരന്റെ സകല തന്ത്രങ്ങളും പാളി. "ഞങ്ങൾ മൊത്തം ടീമുണ്ട് കേട്ടോ" എന്ന പോലീസുകാരന്റെ ഡയലോഗിന് മുന്നിൽ എന്തുചെയ്യണമെന്നറിയാതെ തട്ടിപ്പുകാരൻ ഫോൺ കട്ട് ചെയ്യുകയായിരുന്നു.

പൊതുജനങ്ങൾ ഇത്തരം സൈബർ തട്ടിപ്പുകൾക്കെതിരെ ജാഗ്രത പാലിക്കണമെന്നും, സംശയാസ്പദമായ കോളുകൾ ലഭിച്ചാൽ ഉടൻ പോലീസിനെ അറിയിക്കണമെന്നും ഈ സംഭവം ഓർമ്മിപ്പിക്കുന്നു.