ചക്കിട്ടപാറയിൽ നിയന്ത്രണം വിട്ട് മറിഞ്ഞ ടിപ്പർ ലോറി പെരുവണ്ണാമൂഴി അണക്കെട്ട് ജലാശയത്തിലേക്ക് മറിഞ്ഞു

 

ചക്കിട്ടപാറ: നിയന്ത്രണം വിട്ട് ടിപ്പർ ലോറി റിസർവോയറിലേക്ക് മറിഞ്ഞുണ്ടായ അപകടത്തിൽ ഡ്രൈവർ സജിത്ത് അൽഭുതകരമായി രക്ഷപ്പെട്ടു.ഇന്നലെ   ചക്കിട്ടപാറ അണ്ണക്കുട്ടൻ ചാലിലാണു് സംഭവം. ജലജീവൻ പൈപ്പ് സ്ഥാപിച്ച റോഡ് ഭാഗം കോൺക്രീറ്റ് ചെയ്ത് അടക്കുന്ന പണി ഇവിടെ നടക്കുന്നുണ്ട്. ഇതിനുള്ള സാമഗ്രികൾ ഇറക്കിയ ശേഷം വീതി കുറഞ്ഞ റോഡിലൂടെ മടങ്ങിയ ലോറിയാണു് അപകടത്തിൽ പെട്ടത്. വാഹനത്തിൻ്റെ ഒരു വശത്തെ ചക്രം പുറത്തേക്ക് തെന്നി മാറിയതോടെയാണ് മറിഞ്ഞ് കുറ്റ്യാടി ജലസേചന പദ്ധതിയുടെ  റിസർവോയർ ജലാശയത്തിൽ പതിച്ചത്.  ലോറിയുടെ ചില്ലുകൾ തകർന്നതിനാൽ ആയഞ്ചേരിക്കാരനായ ഡ്രൈവർക്ക് പരിക്കേൽക്കാതെ  രക്ഷപെടാൻ കഴിഞ്ഞു. പിന്നീട് റിക്കവറി വാഹനമെത്തിച്ച് ലോറി കരക്ക് കയറ്റി.