കുവൈറ്റിൽ വീണ്ടും ആൽക്കഹോൾ അടങ്ങിയ രാസ വസ്തു കഴിച്ചതായി സംശയം : രണ്ട് പ്രവാസികൾ ഗുരുതരാവസ്ഥയിൽ

 

കുവൈത്ത് : കുവൈത്തിൽ മദ്യവുമായി സാമ്യമുള്ള അജ്ഞാത രാസവസ്തു കഴിച്ചതിനെ തുടർന്ന് ഏഷ്യക്കാരായ രണ്ട് പ്രവാസികളെ ഗുരുതരാവസ്ഥയിൽ ജഹ്‌റ ആശുപത്രിയിൽ പ്രവേശിപ്പിച്ചു.25,26 വയസ് പ്രായമായ ഒരേ രാജ്യക്കാരും ഒരുമിച്ച് താമസിക്കുന്നവരുമായ ഇരുവരെയും കഴിഞ്ഞ ദിവസം കാലത്ത് എട്ട് മണിയോടെ കോമ അവസ്ഥയിലാണ് ആശുപത്രിയിൽ പ്രവേശിപ്പിച്ചത്. ഉടൻ തന്നെ എംആർഐ സ്കാനുകൾ ഉൾപ്പെടെയുള്ള മെഡിക്കൽ പരിശോധനകൾ നടത്തി ഇരുവരെയും തീവ്രപരിചരണ വിഭാഗത്തിലേക്ക് മാറ്റുകയും തുടർന്ന് ഓപ്പറേഷൻസ് റൂമിലും ബന്ധപ്പെട്ട പോലീസ് സ്റ്റേഷനിലും വിവരം അറിയിക്കുകയുമായയിരുന്നു. സംഭവത്തിൽ കൃത്യമായ അന്വേഷണം ആരംഭിച്ചു. വിഷലിപ്തമായ മദ്യം കഴിച്ചതിനുള്ള സാധ്യത അധികൃതർ തള്ളിക്കളഞ്ഞിട്ടില്ല.ഇവർ കഴിച്ചതായി സംശയിക്കപ്പെടുന്ന പദാർത്ഥത്തിന്റെ സാമ്പിളുകൾ പരിശോധനക്ക് അയച്ചിട്ടുണ്ട്. വിഷ മദ്യം കഴിച്ചതിനേ തുടർന്ന് കഴിഞ്ഞ മാസം 23 പേർ മരണമടയുകയും നിരവധി പേർക്ക് വിഷബാധയേൽക്കുകയും ചെയ്തിരുന്നു.